Vullnetarizmi konsiderohet si arti i dhënies nga zemra, pa pritur asgjë në këmbim, por që ka ndikim të jashtëzakonshëm në komunitet, sidomos kur bëhët fjalë për grupe më të ndjeshme, të cilëve iu nevojitet përkrahje shtese. E këtë më së miri po e dëshmojnë trajnerët vullnetarë të Olimpiadës Speciale të Kosovës (OSK), të cilët po luajnë një rol vendimtar në fuqizimin e djemve dhe vajzave në kategori të ndryshme të sporteve speciale.
Kështu, sportistët si Edona Haxha dhe Besnik Jashanica për vite me radhë po e ofrojnë kohën e tyre dhe ekspertizën për t’i ndihmuar atletët të kapërcejnë barrierat, qofshin ato fizike, intelektuale apo shoqërore dhe të arrijnë potencialin e tyre të plotë.
“Unë jam Besnik Jashanica. Jam vullnetar dhe trajner në pjesën e Olimpiadës Speciale të Kosovës. Punoj që 5 vite pa ndërprerë dhe ndjej kënaqësi të madhe që kam mundësi të jem pjesë e SO-Kosovës (Special Olympics).” – Besnik Jashanica
“Punën në olimpiadë e kam fillu prej vitit 2016. Aty jam angazhu si vullnetare. Po ashtu, punoj si vullnetare edhe te Komiteti Olimpik i Kosovës. Aty e bëj punën prej vitit 2018.”
“Gjithçka ka filluar prej një aktiviteti që u mbajt me personat me nevoja të veçanta tek Olimpiada Speciale e Kosovës. Kam pasur fatin aty me shku si vullnetar dhe t’u e pa gëzimin e këtyre fëmijëve, që këta po ndihen shumë mirë në aktivitetet sportive, atëherë më ka ardhë ideja dhe kam thanë që duhet me vazhdu këtë punë.” – Edona Haxha
Të përkushtuar jo vetëm që ta promovojnë mirëqenien fizike, por gjithashtu edhe integrimin e përsonave me nevoja të veçanta dhe dëmtime intelektuale në komunitet, përmes programeve gjithpërfshirëse, angazhimi i rreth 50 vulletarëve përbën një përpjekje të jashtëzakonshme për fuqizimin e atletëve specialë, dhe njëherazi është edhe punë thellësisht motivuese dhe shpërblyese për këdo që e bën atë.
“Ajo që i kemi dhënë ne fillimisht më së shumti rëndësi është që me i socializu fëmijët sa më shumë me njëri-tjetrin. Në këtë aspekt, (fëmija) arrin më mësu më shumë për arsye se e shohin njëri-tjetrin. Gjithëpërfshirja e ka anën pozitive shumë të mirë në aspektin e shoqërimit, por edhe të rezultatit, Qe 5 vjet i kemi dhënë rëndësi gjithëpërfshirjes, por në kuadër të gjithëpërfshirjes na kanë ardhur edhe rezultatet sikurse janë medaljet ndërkombëtare.” – Besnik Jashanica
Kështu Edona, shpjegon se në cilat sporte kanë arritur të zbatojnë programe e teknika gjithëpërfshirëse në të cilin fëmijët e të rinjtë ushtrojnë, luajnë e garojnë bashkarisht.
“Trajnimet që i bëjmë, ose aktivitetet që i zhvillojmë si trajnerë ose si vullnetarë janë të lidhura me sportin e skijimit, me futboll, basketboll, atletikë, volejboll edhe bowlling. Këto i kemi sportet që më së shumti i bëjmë dhe i ushtrojmë. Po ashtu, i kemi edhe garuesit të cilët i kemi të ndarë në kategori të ndryshme, për të marrë pjesë në gara të ndryshme që mbahen qoftë në Kosovë, qoftë jashtë Kosovës.” – Edona Haxha
E pyetur për rrugëtimin e saj si vullnetare në Olimpiadën Speciale dhe Komitetin Olimpik të Kosovës, Edona shpjegon se falë angazhimit të saj ajo ka arritur, që përmes punës vullnetare të avancohet tutje edhe profesionalisht, duke ndjekur kështu trajnime adekuate për adaptimin e teknikave të ndryshme të trejningut për atletët specialë.
“Unë rreth vetes kam njerëz të fushës së sportit. Duke e parë angazhimin tim, por edhe postimet që i bëj në rrjetet sociale, ata e kanë pa që unë falë një punës së vogël vullnetare që e kam bërë qysh prej vitit 2016, sot kam arritur të jem kjo që jam. Normalisht, duke i ndjekur edhe trajnimet të cilat mbahen specifikisht për fëmijët me nevoja të veçanta dhe dëmtime intelektuale.” – Edona Haxha
Ajo madje shpjegon se shembulli i saj ka nxitur tutje edhe vullnetarët e tjerë që të ndjekin dhe vazhdojnë rrugën e saj, duke qenë të gatshëm për të dhënë kontributin e tyre kurdo që kërkohet.
“Përveç punëve që i kemi jashtë punës vullnetare, asnjëherë nuk kam probleme me vullnetarë. Sa herë që i thirri, sa herë që kemi nevojë për me marrë pjesë në aktivitete të ndryshme, ata janë të gatshëm.” – Edona Haxha
E një angazhim të tillë të pashoq të vullnetarëve, sipas Besnikut, e ndihmon dhe fuqizon edhe më tepër mbështetja institucionale, e cila viteve të fundit është vërejtur dukshëm.
“Nëse nuk ishin kanë mbështetjet institucionale, mundësia me arritë me këta fëmijë ish kanë shumë ma e zbehtë. Normal që kur e ke mbështetjen e institucioneve është shumë ma e lehtë, për arsye se munden me u shfrytëzu ambientet si ky (salla ku ushtrohet), sigurohet ushqimi, transporti i fëmijëve, mund të marrim pjesë në gara ndërkombëtare. Nëse nuk e ke shtetin mbrapa, nuk ke mundësi të marrësh pjesë në gara ndërkombëtare.” – Besnik Jashanica
Kështu, sipas Besnikut, edhe atletëve iu krijohen kushte më të favorshme për ndjekjen e stërvitjeve, por edhe integrimin e më tutjeshëm të tyre në shoqëri.
Falenderimin për angazhimin e trajnerëve vullnetarë nuk kursehet ta shpreh Florent Aziri, djaloshi 23 vjeçar i cili së voni ka fituar çmimin e parë për hedhjen e gjylës në garat olimpike speciale në Berlin.
“Unë jam Florent Aziri. Jam 23 vjeçar dhe merrem me futboll, me bowlling, basketboll dhe skijim. Medaljen (vendin e parë) kam fitu në Gjermani (Berlin) në hedhjen e gjylës.” – Florent Aziri
Florenti madje ka një mesazh në lidhje me vullnetarizmin e trajnerëve të tij dhe tjerëve që duan të ndjekin hapat e tyre.
“Shumë e mirë është kjo punë, sepse e humbin kohën me neve, kënaqen me neve dhe ne jemi krenarë me ta.” – Florent Aziri
Fjalëpak, por tejet mirënjohës dhe i kënaqur me punën e trajnerëve dhe vullnetarëve shprehet edhe një nga prindërit e atletëve të rinj, Xhelal Gashi, i cili vë në pah ndikimin pozitiv që trajnerët kanë pasur në mirëqenien dhe motivimin e djalit të tij Leartit.
“Unë jam Xhelal Gashi. Jam nga Ferizaj dhe jam prind i Leartit i cili është me Down Sindromë dhe merr pjesë në lojërat olimpike speciale të Kosovës… Duke biseduar me Leartin, vetë fakti që vullneti i tij për të ardhur këtu tregon që kalon fenomenal me trajnerët.” – Xhelal Gashi
Por, që puna me atletët specialë të mos ndalojë, por të vazhdojë tutje, patjetër që ka nevojë të këtë angazhim qytetar, sidomos sportistëve të rinj, të cilët mund të kontribuojnë më aktivisht në sporte të ndryshme, shprehen Edona dhe Besniku, duke ftuar kështu kolegët e tyre t’u bashkohen në stërvitje.
“Unë kisha dashur t’ju them personave të tjerë që dëshirojnë me ndihmu, ju lutem ejani dhe ndihmoni, për arsye se ndiheni mirë shpirtërisht, por në të njejëtën kohë punoni për komunitet dhe padyshin që shpërbleheni në forma të ndryshme.” – Besnik Jashanica
“Puna ma e dobishme që e kam marrë prej këtyre angazhimeve ka qenë kënaqësia dhe të arriturat e personave me nevoja të veçanta tek Olimpiada Speciale e Kosovës.. Suksesi i këtyre fëmijëve është gjithçka për neve, qoftë si Olimpiadë, qoftë si trajnerë të olimpiadës. Me këtë e kupton që edhe ti si trajner, puna që e ke ba ma në fund t’u ka shpërbly.” – Edona Haxha
Vullnetarizmi në fushën e sportit I kontribuon komunitetit duke promovuar gjithëpërfshirjen dhe thyerjen e barrierave shoqërore, duke nxitur një shoqëri më empatike dhe më mirëkuptuese. Ai gjithashtu fuqizon individët me aftësi të kufizuara për të bërë jetë më të pavarur dhe për t’u përfshirë në mënyrë aktive në aktivitete shoqërore, dhe duke pasuruar përvojën kolektive të të gjithë komunitetit.
Edicionin #20 të plotë e gjeni KËTU 🙂
Kliko këtu dhe bonja Follow/pëlqeje Katror.info për me pa veç Lajme të Mira 🙂
Përgatiti:
