Presidenti i Shteteve të Bashkuara, Donald Trump, ka njoftuar më 2 prill vendosjen e tarifave për importet nga të gjitha vendet e botës. Në listat e publikuara të shteteve që SHBA-ja u ka vënë tarifa, figuron edhe Kosova me 10 për qind tarifa. Derisa, vendet e tjera të rajonit figurojnë në këtë përqindje tarifash: Shqipëria 10%, Mali i Zi 10%, Serbia 37%, Maqedonia e Veriut 33%, Bosnja e Hercegovina 35%, shkruan Katror.info.
Trumpi ka bërë të qartë për të gjithë liderët botërorë se nëse ata duan të përjashtohen nga “tarifat e tij reciproke”, atëherë ata duhet të ndryshojnë politikat e tyre tregtare.
“Anuloni tarifat tuaja, hiqni barrierat, mos manipuloni me valutat, dhe filloni të blini mallra amerikane në vlerë prej miliarda dollarësh”, ka thënë ai.
Mundesh me e lexu edhe…
Por, si qëndron tregtia mes Kosovës e SHBA-së. Eksportet nga Kosova drejt SHBA-së kanë përfshirë produkte të ndryshme, përfshirë pajisje elektronike dhe produkte të industrisë së tekstilit.
Sipas të dhënave të Doganës së Kosovës, shifra të raportuara nga Radio Evropa e Lirë, në vitin 2019, Kosova eksportoi produkte në vlerë prej 3 milionë eurosh në SHBA, ndërsa importet nga SHBA-ja ishin 45.7 milionë euro. Rritja ka vazhduar vit pas viti, dhe në vitin 2020 eksportet arritën në 23 milionë euro, ndërsa importet u rritën në 58.1 milionë euro. Pjesa më e madhe e eksportit nga Kosova në SHBA është regjistruar në vitin 2021, me një vlerë prej 123.2 milionë euro, ndërkohë që importet arritën në 92.9 milionë euro.
Në vitin 2022, eksportet nga Kosova në SHBA ishin 131.1 milionë euro, ndërsa importet nga SHBA-ja arritën në 69.8 milionë euro. Megjithatë, në vitin 2023 eksportet u ulën në 103 milionë euro, ndërsa importet u rritën në 81.3 milionë euro. Sipas të dhënave të vitit 2024, eksportet kosovare janë vlerësuar në 39.1 milionë euro, ndërsa importet në 106.5 milionë euro.
Vendimi i Presidentit Trump për të vendosur një tarifë prej 10 përqind për importet nga Kosova, si dhe nga shtete të tjera të rajonit, ka shkaktuar shqetësim për efektet e mundshme në tregtinë dhe ekonominë e Kosovës. /Katror.info.
Përgatiti:
