Administrata e presidentit amerikan, Donald Trump ka bërë të ditur se po ia ngrin më shumë se dy miliardë dollarë të fondeve federale Universitetit të Harvardit, disa orë pasi Kolegji elitar hodhi poshtë një listë të Shtëpisë së Bardhë – raporton televizioni britanik BBC.
“Deklarata e sotme e Harvardit përforcon mendësinë shqetësuese të të drejtave që është endemike në Universitetet dhe Kolegjet më prestigjioze të vendit tonë.” – thuhet në deklaratën e Departamentit të Arsimit.
Shtëpia e Bardhë i dërgoi një listë kërkesash Harvardit javën e kaluar, ku thuhej se ishin hartuar për luftimin e antisemitizmit në kampus. Ato përfshinin ndryshime në qeverisjen e tij, praktikat e punësimit dhe procedurat e pranimit.
Mundesh me e lexu edhe…
Harvard hodhi poshtë kërkesat të hënën dhe njoftoi se Shtëpia e Bardhë po përpiqej të “kontrollonte” komunitetin e tij.
Është Universiteti i parë i madh amerikan që sfidon presionin nga Administrata Trump për të ndryshuar politikat e tij. Ndryshimet gjithëpërfshirëse të kërkuara nga Shtëpia e Bardhë do të kishin transformuar operacionet dhe do t’i jepnin një kontroll të madh Qeverisë federale.
Presidenti Trump ka akuzuar Universitetet kryesore se kanë dështuar të mbrojnë studentët hebrenj kur kampuset e Kolegjeve në mbarë vendin u tronditën nga protestat kundër luftës në Gazë dhe mbështetjes amerikane për Izraelin vjet.
Në një letër drejtuar komunitetit të Harvardit të hënën, presidenti Alan Garber ka theksuar se Shtëpia e Bardhë kishte dërguar një “listë të përditësuar dhe të zgjeruar të kërkesave” të premten së bashku me një paralajmërim se Universiteti “duhet të pajtohet”, në mënyrë që të ruajë “marrëdhëniet financiare” me Qeverinë.
“Ne e kemi njoftuar Administratën përmes avokatit tonë ligjor se nuk do ta pranojmë marrëveshjen e propozuar prej tyre.” – ka shkruar ai. “Universiteti nuk do të heqë dorë nga pavarësia e tij, ose nuk do të heqë dorë nga të drejtat e tij kushtetuese.”
Garber shtoi se Universiteti nuk e “merr lehtë” detyrimin për luftimin e antisemitizmit, por tha se Qeveria po e tepronte.
/Rexhep Maloku – Kallxo.com/Katror.info
Përgatiti:
