Universiteti i Prishtinës ka nënshkruar një memorandum mirëkuptimi me Universitetin Nacional Sun Yat-Sen të Tajvanit, një hap i rëndësishëm për forcimin e bashkëpunimit akademik ndërkombëtar, shkruan Katror.info.
Lajmin për nënshkrimin e këtij memorandumi e ka bërë të ditur drejtoresha për marrëdhënie ndërkombëtare në Universitetin Nacional Sun Yat-Sen të Tajvanit, Tanya Hsu, nëpërmjet një emaili dërguar rektorit të UP-së, Arben Hajrullahu, dhe prorektores Rozafa Basha.
Zonja Hsu ka shprehur kënaqësinë që Kosova do të shtohet në listën e vendeve ku studentët nga Tajvani mund të studiojnë, duke theksuar se Universiteti Nacional Sun Yat-Sen është i hapur për të pritur studentë nga Kosova, dhe se kjo mundësi do të kontribuojë në integrimin e mëtejshëm të studentëve kosovarë në komunitetin ndërkombëtar.
Mundesh me e lexu edhe…
Memorandumi i nënshkruar nga rektorët Arben Hajrullahu dhe Chih-Peng Li synon të forcë bashkëpunimin në fusha të ndryshme si trajnimi, kërkimi, zhvillimi i kurrikulës, edukimi pasuniversitar dhe shkëmbimi i studentëve dhe personelit mësimor. Ky bashkëpunim do të ofrojë mundësi të reja për studentët dhe profesorët e të dy universiteteve.
Një takim paraprak për këtë bashkëpunim ishte mbajtur në janar 2025, kur Anna Y. C. Ho, zëvendësdrejtoresha e Zyrës Përfaqësuese të Taipeit në Hungari, vizitoi Universitetin e Prishtinës dhe diskutoi për mundësitë e bursave që mund të ofrohen për studentët kosovarë nga Universiteti Nacional Sun Yat-Sen./Katror.info
Përgatiti:
