Rreth 1.5 milion euro janë ndarë për ndërtimin e Tregut të Gjelbër në Podujevë, gurthemeli për vendosjen e të cilit është vënë sot ku ka marrë pjesë dhe kryeministri Albin Kurti së bashku me kryetarin e komunës së Podujevës Shpejtim Bulliqi, raporton Ekonomia Online.
Kryeministri Albin Kurti tha se tregu i gjelbër do të jetë një qasje shtesë si për qytetar konsumator gjithashtu edhe për bizneset e Llapit edhe më gjerë.
“Do t’i ketë tri etazhe, do të ketë podrum, përdhese dhe do të jetë kati i I. Podrumi do të jetë depo dhe parking, kati i parë do të jenë dyqane, por gjithashtu do të ketë edhe katin tjetër i cili do të jetë me 40 tezga për fruta dhe për perime. Tregu i gjelbër në këtë mënyrë do të jetë një qasje shtesë si për qytetar konsumator gjithashtu edhe për bizneset e Llapit edhe më gjerë. Është një investim prej 1.5 milion euro, punimet do të bëhen për 300 ditë”, tha Kurti gjatë vendosjes së gurthemelit të Tregut të Gjelbër.
Mundesh me e lexu edhe…
Kurse, kryetari i komunës së Podujevës, Shpejtim Bulliqi, tha se qeverisja Kurti po jep ndihmë në gjitha segmentet si komunës ashtu në përgjithësi në Kosovë.
“Data e sodit është e veçantë për arsye se sot katër vite,VV-ja ka fituar për herë të parë në Llap. Ky është një projekt i kamotshëm, i pritshëm për të pasur ata të cilët i zhvillojnë këtë veprimtari dhe kemi të bëjmë me lokacionin e vjetër të stacionit të autobusëve. Duhet falënderuar Ministrinë e Zhvillimit Rajonal pasi është në bashkëpunim me komunën. Krejt këto po bëhen në saj të një qeverisje të mirë të Kurtit dhe ndihmën që po e jep në gjitha segmentet si neve si komunë dhe në përgjithësi në Kosovë”, tha ai.
Ndërsa, sot është vënë edhe gurthemeli për projektin e dytë që ka filluar sot në komunën e Podujevës, atë të Qendrës së Kompetencës, në fshati Livadicë.
Kryeministri Albin Kurti tha se me investimet e bëra nga qeveria, edukimi dhe ekonomia po bëhen bashkë.
“Kjo shkollë e kompetencës do të ketë edhe dhoma për mësim teorik dhe mësim praktik. Konkretisht do të jenë 18 dhoma për mësim praktik, 15 për teorik dhe 17 dhoma të tjera për administratë dhe logjistikë. Kushtet do të jenë moderne. Në bazë të kontratës punëkërkuesi është zotuar për 14 muaj do t’i përmbyll këto punime dhe do të ndërlidhen me parkun industriale. Në këtë mënyrë edukimi dhe ekonomia po bëhen bashkë”, tha Kurti.
Ndërsa, kryetari i komunë së Podujevës, Shpejtim Bulliqi tha se janë duke u bërë përpjekje që të kalohet në mësimin në një ndërrim.
“Po krijojmë një hapësirë të re duke liruar hapësira të nivelit fillor që gradualisht të bëjmë përpjekje të kalojmë në mësimin në një ndërrim. E veçanta e kësaj shkolle është se po e bëjmë në hapësirën e parkut industrial”, tha Bulliqi.
Ministrja e Arsimit, Arbërie Nagavci tha se kjo shkollë e kompetencës, e lidh edhe më shumë shkollimin me ekonominë, duke ofruar mundësi për implementimin e edukimit dual.
“Një investim i ministrisë së arsimit bashkë me komunën e Podujevës. Janë mbi 2 milion e 200 mijë euro që do të investohen në ndërtimin e kësaj shkolle të kompetencës, e cila e lidh edhe më shumë shkollimin me ekonominë, duke ofruar mundësi për implementimin edhe më të madh për projektin tonë të edukimit dual”, tha ajo. /EO/Katror.info
Përgatiti:
