Planet e reja nga Bashkimi Evropian për të rritur shpenzimet për mbrojtjen mund të mobilizojnë deri në 800 miliardë euro (841 miliardë dollarë), tha të martën Presidentja e Komisionit Evropian, Ursula von der Leyen.
“Evropa është e gatshme të rrisë masivisht shpenzimet për mbrojtjen. Si për t’ju përgjigjur urgjencës afatshkurtër për të vepruar dhe për të mbështetur Ukrainën, ashtu edhe për të adresuar nevojën afatgjatë për të marrë më shumë përgjegjësi për sigurinë tonë evropiane”, tha ajo në një deklaratë për shtyp, shkruan CNBC, transmeton Katror.info.
Von der Leyen tha se u kishte shkruar udhëheqësve evropianë përpara takimit të Këshillit Evropian më vonë këtë javë për të propozuar “Planin ReArm Europe”, i cili ka për qëllim të mundësojë shtetet anëtare të BE-së të rrisin shpenzimet për kapacitetet mbrojtëse.
Mundesh me e lexu edhe…
“ReArm Europe mund të mobilizojë afër 800 miliardë euro për një Evropë të sigurt dhe të qëndrueshme”, tha ajo. “Ky është një moment për Evropën. Dhe ne jemi të gatshëm të veprojmë.”
Plani do të përfshijë 150 miliardë euro huamarrje të reja të përbashkët nga BE për shtetet anëtare, për të investuar në ato që von der Leyen i përshkroi si “fusha të mundësive pan-evropiane.”
“Për shembull: mbrojtja ajrore dhe kundër raketave, sistemet e artilerisë, raketat dhe municioni, dronët dhe sistemet kundër dronëve; por gjithashtu për të adresuar nevoja të tjera, nga siguria kibernetike deri te lëvizshmëria ushtarake, për shembull”, shtoi ajo.
Bashkimi Evropian mori hapat e kontestuar të huamarrjes së përbashkët për herë të fundit në vitin 2020, pas pandemisë.
27 udhëheqësit e BE-së do të mblidhen të enjten në Bruksel për një takim të dedikuar për mbrojtjen dhe mbështetje për Ukrainën, ku do të diskutohet për propozimet e ReArm Europe.
Përgatiti:
