Fotografë dhe videografë, profesionistë dhe amatorë nga Shqipëria dhe 36 vende të ndryshme të botës, sollën imazhe dhe filmime mahnitëse në edicionin e dytë të konkursit ndërkombëtar “Wanderlust”, që shpalos Shqipërinë përmes bukurive natyrore dhe trashëgimisë së saj kulturore e historike.
Ky event, i kthyer tashmë në një platformë të fuqishme për promovimin e industrisë shqiptare të turizmit, tërhoqi vëmendjen me pjesëmarrjen e autorëve nga vende të largëta si Mauritius, Kolumbia, Uruguaji dhe Indonezia. Në faqen zyrtare të konkursit u ngarkuan plot 5.504 materiale vizuale, që dëshmojnë për një interes gjithnjë në rritje për potencialet turistike të Shqipërisë.
“Mbrëmja sonte nuk është vetëm një mbrëmje ndarjeje çmimesh, por është edhe një celebrim i fuqisë së turizmit për të ngritur ura, për të afruar kulturat dhe për të treguar historinë e Shqipërisë turistike me metodat e reja të epokës digjitale,” deklaroi Zana Çela, drejtuese e Agjencisë Kombëtare të Turizmit, gjatë ceremonisë përmbyllëse të konkursit.
Mundesh me e lexu edhe…
Në fjalën e saj, znj. Çela prezantoi edhe përditësimet më të fundit në aplikacionin TEA, i cili tashmë do të ofrojë versionin 3.0 me informacion të zgjeruar për plazhet publike dhe private të vendit, mënyrën e aksesimit të tyre dhe një mundësi interaktive për turistët për të raportuar problematika në zonat që vizitojnë.
Pjesëmarrësit konkurruan në 11 kategori të ndryshme që përfshinin peizazhin, foton panoramike, foton monumentale, site arkeologjike, folklor, artizanat, agroturizëm dhe kulinari, ndër të tjera.
Në përfundim të eventit u shpërndanë gjithsej 40 çmime, mes të cilave 4 çmime për ambasadorët e promovimit të turizmit dhe 3 çmime të dhëna nga publiku, duke vlerësuar më të mirët në këtë festival të imazhit dhe pasionit për Shqipërinë./Katror.info
Përgatiti:
