Imagjinoni sikur të mund ta tërhiqnit lagështinë nga ajri përmes majave të gishtërinjëve dhe si rezultat të krijonit rrymë elektrike- kjo mbase tingëllon sikur përralla superheronjësh, apo jo?
Por, kjo nuk është përrallë, pasi studiuesit me eksperimentin e tyre kanë përdorur një enzimë bakteriale që përcjell hidrogjenin për të krijuar energji elektrike, pikërisht nga ajri.
Një eksperiment i fundit nga Instituti i Zbulimit të Biomjekësisë në Universitetin Monash, në Australi, ka zbuluar se shumë baktere përdorin hidrogjenin nga atmosfera si një burim energjie në mjedise me lëndë të varfëra ushqyese, shkruan Goodnewsnetwork.
Mundesh me e lexu edhe…
“Ka kohë që ne e dimë se bakteret mund të përdorin gjurmët e hidrogjenit në ajër si një burim energjie për t’i ndihmuar ato të rriten dhe të mbijetojnë, duke përfshirë tokat e Antarktidës, krateret vullkanike dhe në oqean të thellë,” ka thënë Chris Greening, profesor në Universitetin Monash, ‘’Por deri tani nuk është ditur se si arrinin bakteret ta bënin këtë’’, ka shtuar ai.
Një zbulim i tillë premton të hapë një fushë të re të energjisë së pastër e cila do t’i ngjasonte të bëmave nëpër filma fantastiko – shkencorë, përcjell Katror.info.
Në zbulimin e tyre të publikuar në ‘’Nature’’, tregohet se studiuesit nxorrën enzimën e cila është përgjegjëse për përdorimin e hidrogjenit atmosferik nga një bakter i quajtur Mycobacterium smegmatis. Ata treguan se kjo enzimë, e quajtur Huc, e kthen gazin e hidrogjenit në rrymë elektrike.
Bashkëautori Dr. Rhys Grinter thotë se kjo enzimë është jashtëzakonisht efikase, “Ndryshe nga të gjitha enzimat dhe katalizatorët kimikë të tjerë të njohur, kjo enzimë madje konsumon hidrogjen nën nivelet atmosferike – aq pak sa 0.00005% e ajrit që thithim’’, thotë ai.
Sipas punës laboratorike të studentës Ph.D. Ashleigh Kropp, tregohet se kjo enzimë (Huc), mund të ruhet e pastruar për periudha të gjata.
“Është jashtëzakonisht e qëndrueshme,” thotë ajo. “Kjo enzimë mund të ngrihet ose të ngrohet deri në 80 gradë Celsius, dhe ta ruajë fuqinë e saj për të gjeneruar energji. Kjo reflekton se kjo enzimë ndihmon bakteret të mbijetojnë në mjediset më ekstreme.”
Bakteret që prodhojnë enzima si Huc janë të zakonshme dhe mund të rriten në sasi të mëdha, që do të thotë se njerëzimi potencialisht mund të ketë qasje në një burim të qëndrueshëm të enzimës. Dr. Grinter thotë se një objektiv kyç për punën e ardhshme është rritja e prodhimit të enzimës ‘’Huc’’.
“Pasi të prodhojmë Huc në sasi të mjaftueshme, atëherë, vetëm qielli do të ishte kufiri për përdorimin e kësaj enzimje për të prodhuar energji të pastër.”
“Ky është një zbulim vërtetë emocionues që ta ndryshonte lojën në adresimin e ndryshimeve klimatike, dhe një gjë e tillë i përshtatet fuqisë së kërkimit të Universitetit Monash në zhvillimin e zgjidhjeve të menqura për problemet më urgjente në botë. Një përgëzim i madh për [ekipin] për këtë arritje fantastike,” ka thënë Zëvendës Kancelarja, Prof. Rebekah Brown, e cila nuk ishte e përfshirë në studim./Katror.info
Përgatiti:
