Zyra e Rregullatorit të Energjisë (ZRRE) ka theksuar se ende nuk është marrë asnjë vendim për rritjen e tarifave të energjisë.
ZRrE në një postim në Facebook shkruan se me qëllim që të sigurohet transparencë dhe të krijohet mundësia e një dialogu të hapur nga të gjitha palët e interesuara, ZRRE-ja ka vendosur të ndajë për konsultim publik Raportin Konsultativ për të Hyrat e Lejuara Maksimale.
“Në kuadër të përpjekjeve për të garantuar një proces të hapur dhe transparent, ZRRE-ja fton të gjitha palët e interesuara – përfshirë konsumatorët, organizatat e shoqërisë civile, bizneset, që të paraqesin komentet dhe sugjerimet e tyre mbi raportin e publikuar deri më 28 mars. Ky proces është një mundësi për të siguruar që çdo vendim të marrë të bazohet në mendime të shumta dhe të ndihmojë në krijimin e një sistemi të drejtë dhe të balancuar për të gjithë”, bëhet e ditur në njoftim.
Mundesh me e lexu edhe…
Ndërkaq, ditë më parë kryetari i Bordit të ZRRE-së, Ymer Fejzullahu, ka arsyetuar propozimin e Zyrës së Rregullatorit për ngritjen e çmimit të energjisë elektrike për 15%. Ai thënë se kjo rritje është bërë 100% duke u bazuar në inflacionin global.
Sipas tij, edhe pse ka pasur rritje të çmimit të energjisë në tri vitet e fundit, Kosova ende mbetet në fund të listës së vendeve me çmimin më të lirë të energjisë elektrike.
Ai po ashtu kishte thënë se kërkesat e kompanive për furnizim me energji elektrike ishin që çmimi të rritej për 35%, por pas konsultimeve u propozua që çmimi të rritet për 15%.
Propozimi po kundërshtohet nga qytetarët, të cilët kanë paralajmëruar edhe protesta.
Auron Doli nga grupi “Asnjë cent ma shumë” që kundërshton rritjen e çmimit të energjisë elektrike, ka deklaruar se çmimi aktual i energjisë elektrike është i lartë, derisa ka bërë thirrje që ai të ulet, e jo të ngrihet, siç është paralajmëruar.
“Si qytetarë do të bëjmë maksimalisht që kjo të mos ndodhë (rritja e çmimeve të rrymës v.j.). Aksionet do të shumëfishohen, do të bëhen dita-ditës edhe më radikale. Do të bëjmë protesta, por edhe mendoj që duhet të ketë edhe mënyra më kreative dhe alternative të qasjes. Për shembull, bojkoti i pagesës së rrymës do të funksiononte nëse do të kishte organizim të madh të qytetarëve”, ka deklaruar Doli./Katror.info
Përgatiti:
