Tirana ka marrë zyrtarisht Presidencën e Rrjetit më të madh të qyteteve të Ballkanit, B-40.
Në samitin e mbajtur në kryeqytet, ku morën pjesë kryetarë bashkie dhe delegacione nga 54 qytete të Ballkanit, kryebashkiaku Erion Veliaj tha se kjo është koha për bashkëpunim si kurrë më parë.
“Ne e hapim kanat zemrën për mikun dhe për të gjithë miqtë që janë këtu sot, e kemi zemrën të mbushur plot. Mikpritja nuk është një rrugë me një drejtim, është një rrugë vajtje-ardhje, është marrje dhe dhënie. Besoj se sot jemi në vendin e duhur ku guri i qoshes është pikërisht bashkëpunimi, marrja dhe dhënia me njëri-tjetrin. Jemi me zemrën e hapur për miq si ju, gati t’ju presim, t’ju japim edhe ne pjesën tonë më të mirë të kulturës e mikpritjes sonë dhe është koha për një bashkëpunim të jashtëzakonshëm mes nesh si kurrë më parë”, tha Veliaj.
Mundesh me e lexu edhe…
Ai vuri në dukje transformimin e jashtëzakonshëm të kryeqytetit shqiptar, jo vetëm për arkitekturë dhe teknologji, por edhe si një qytet evropian.
Po ashtu kyebashkiaku propozoi që të ketë një fond solidariteti për të gjitha bashkitë e rajonit tonë në raste fatkeqësish.
“Në Presidencën e Tiranës, ne duam të propozojmë një fond solidariteti për të gjitha bashkitë e rajonit tonë. Bashkia e Tiranës e ka bërë rregullisht këtë me qytetet e rajonit tonë. Kishim përmbytjet në Tetovë, po ashtu në Kosovë, tërmetin në Zagreb, zjarret në Athinë. Do të donim të mos ishim vetëm, dhe të mos bëja me një bashki, ose secila bashki veç e veç. Ndaj, ne duam të propozojmë një fond solidariteti për t’ju gjendur në mënyrë emergjente një prej anëtarëve tanë, i cili ka një nevojë të një fatkeqësie natyrore për fonde që mund t’i mobilizojmë menjëherë dhe mund të jetë efektive në një kohë sa më të shpejtë që të jetë e mundur”, tha Veliaj.
Gjithashtu ka shtuar që në këtë platformë të B40 në Tiranë, të flitet më shumë për qytetet inteligjente dhe transformimin digjital të qyteteve, dhe për ekonominë lokale dhe bashkëpunimin kulturor, për t’i parë qytetet edhe si motor të ekonomisë.
Sakaq, Presidenti Bajram Begaj tha se Tirana mikpritëse ka pësuar një zhvillim të jashtëzakonshëm, sidomos 10 vitet e fundit.
“Tirana gjatë viteve të fundit nën drejtimin e Erionit, ka treguar se di të gjejë balancën midis zhvillimit ekonomik dhe qëndrueshmërisë, midis përtëritjes kulturore dhe inovacionit teknologjik, midis traditës dhe të resë”, tha ai.
“Natyrisht, ka ende shumë punë për të bërë, sepse pritshmëritë e qytetarëve tanë ecin paralelisht me qytetin. Bashkë me to, duhet zhvilluar edhe vizioni i administrimit të qytetit, ndonjëherë kjo nuk është çështje sasie, por cilësie. Ndaj shërbimet duhet të jenë cilësore dhe vizioni duhet të jetë i qartë sepse çdo vendimmarrje prek jo vetëm të tashmen, por orienton edhe të ardhmen tonë”, vijoi Begaj./Katror.info
Përgatiti:
