Para disa ditëve kudo në rrjete sociale ka qenë e shpërndarë një pamje e re që i është shtuar fshatit Mushtisht të Therandës; një minibibliotekë në stacionin e autobusëve u mirëprit nga shumë qytetarë.
Pritjet nganjëherë janë të gjata në këtë stacion. E një mënyrë e veçantë që koha e pritjes të mos bëhet monotone është kjo minibibliotekë, që ka pak kohë që i është shtuar fshatit Mushtisht të Therandës, shkruan Koha.net.
Valdrin Halitjaha për një periudhë kishte jetuar në Amerikë. Shembujt e mirë që mori nga bota u mundua që përmes shoqatës “Yjet” t’i sjellë edhe në fshatin e tij të lindjes.
Mundesh me e lexu edhe…
Minibiblioteka ishte një ndër projektet që mezi priti të lulëzonte edhe në Mushtisht. Nisi me 100 libra, por tani fshatarët po kontribuojnë në pasurimin e bibliotekës duke i shkëmbyer ato, por edhe duke sjellë tituj të rinj.
“Ideja fillestare ka qenë nga SHBA-ja, kur kam jetuar atje kam pa biblioteka të tilla dhe nga aty më erdhi ideja që kur të kthehem ta bëj edhe në fshatin tim. Në partneritet me bizneset lokale ne arritëm ta funksionalizojmë këtë bibliotekë e cila po pritet shumë mirë nga banorët lokalë, e madje edhe nga banorët e vendeve të tjera, sepse pamja e minibibliotekës u shpërnda shumë në rrjete sociale. E nisëm me 100 libra, por kemi parë që qytetarët kanë marrë, por edhe sollën libra, shpresoj edhe fshatrat e tjera të marrin një shembull të tillë”, thotë Halitjaha
Stacioni i Autobusëve në Mushtisht ishte lokacioni më i mirë për t’u vendosur kjo bibliotekë e vogël. Sipas tij, pritja bëhet atraktive nëse arrijmë të lexojmë së paku një faqe nga ndonjëri prej këtyre librave.
“Rreth gjysmë ore është koha që qytetarët mund të presin autobusin, mirëpo kjo nuk është vetëm për udhëtarët, por edhe për banorët e tjerë që kalojnë këndej, kushdo mund të marrë librin, ta lexojnë, e më pas ta kthejnë”, tregon ai.
Tregon se minibiblioteka do të qëndrojë në stacion derisa në fshat të investohet për një bibliotekë më të madhe.
“Dëshira jonë është që të kemi një bibliotekë më të madhe publike në fshat, mirëpo meqenëse nuk e kemi atë, atëherë kjo minibibliotekë është këtu por nuk është afatgjatë”, shton ai.
E sipas kryesuesit të fshatit, Reshat Selimi, biblioteka e vogël është një nga projektet më të mira, një dhuratë e lezetshme që i është bërë Mushtishtit.
“Është realizuar ky projekt me shumë dashuri nga shoqata ‘Yjet’ që vepron në Mushtisht, kjo minibibliotekë ka bërë jehonë në gjithë vendin e përpos që na shërben neve, ky projekt është shembull i mirë edhe për vende të tjera që në mënyrë graduale të kthejmë rininë kah leximi e që në fakt këto kohët e fundit është mjaft i zbehur. Është pritur shumë mirë nga banorët madje kanë filluar të marrin libra, por unë dua të bëj apel që sa më shumë të lexojnë dhe banorët që kanë libra që nuk i lexojnë në shtëpi t’i sjellin këtu e po ashtu edhe të kenë kujdes të mos dëmtohet kjo hapësirë”, thotë Selimi.
Mbresëlënëse për të mbetet kureshtja e banorëve për të parë titujt që aktualisht janë në minibibliotekë.
“Shumë i lumtur kam qenë kur kam pa të rinj që ndaleshin dhe interesoheshin për hapësirën e re që i është shtuar fshatit. Ky lokacion është caktuar në koordinim mes shoqatës dhe kryesisë, në këtë vend ka shumë frekuentim të banorëve dhe është ide e mirë që gjatë kohës së pritjes të lexojnë diçka”, shton në fund ai.
Fshati Mushtisht dikur kishte pasur një bibliotekë funksionale, porse tani 4 mijë titujt që ishin në të janë bartur në bibliotekën e shkollës. Në anën tjetër, banorët presin të investohet dhe të bëhet një vend i veçantë për të shkëmbyer e lexuar libra./Katror.info
Marrë nga Koha.net.
Përgatiti:
