Mundesh me qenë super-kuzhinier/e, besa edhe gurman/e e me provu gjithëçka, veç me ushqim tradicional t’tonin nuk ka. Recetat unike t’gjysheve e pjata e stër-mbushuna prej gjysheve, nuk kanë qysh me u kuptu ndryshe, përpos si gjuhë univerzale e dashnisë t’tyre. E për gjyshet kosovare, kjo vlenë edhe ma tepër sidoms nëse i kujtojmë pitet, leçenikat, krelanat, llokumet e bukët e tyre.
Për ty që ke qejf me gatu ushqime tradicionale, por preferon edhe me i marrë me vehte për pauzë, apo me ua ba gati fëmijëve ushqimin për shkollë – ne e kemi gjetë zgjidhjen perfekte n’5 hapa t’thjeshtë. Bahet fjalë për krelanën me kungulleshë e proshutë që sa asht tradicionale, aq asht edhe inovative sa i përket kombinimit dhe shijes.
PËRBËRËSIT:
1 lugë gjelle gjalpë
70 gr proshutë (e prerë imët)
1 qepë (e imtësume)
5 vezë
150 gr kashkavall (i grirë n’rende)
150 gr miell
1/4 gotë vaj ullini
1 lugë e mesme pecivë / pluhun për pjekje
350 gr kungullesha (t’grira n’rende)
Kripë dhe biber i zi (Opsionale)
HAPI 1:
Para se me fillu me përgatitjen, nxeje furrën n’200 C e pastaj n’tigan t’nxehtë shto proshutën dhe qepën dhe kavërdisi për 3-5 minuta pa vaj. Largoje masën prej tiganit dhe leje me u ftohë masa dikund.
HAPI 2:
N’nji enë t’thellë shto vezët, miellin, kashkavallin, pecivën, kripën e biberin dhe mixin e proshutës me qepë t’fërgume. Shto edhe vajin e ullini. Përzije masën mirë.
HAPI 3:
Shtoja masës t’përzime kungulleshat e grira dhe përzije masën mirë.
HAPI 4:
N’tepsi me letër për pjekje shtoje masën dhe pjeke n’furrë për 35-40 minuta. Mos harro me ja ulë temperaturën furrës prej 200 C n’180 C.
HAPI 5:
SIgurohu që krelana asht pjekë mirë dhe që korja sipër t’jetë e artë. Largoje prej furrës, vendose sipër 1 pecetë dhe leje krelanën me u ftohë n’temperaturë dhome për 20 minuta, pastaj servo.
REZULTATI:
Servo krelanën me nji gotë kos, ndonji copë djathi a kastraveca turrshi e speca t’fërgum. Besa tash mundesh me e shoqnu këtë delikatesë edhe me tomatinat e mbushuna me djathë, t’cilat i ke gati n’2 hapa t’thjeshtë e t’shpejtë. Ti poashtu mundesh me e përgatitë këtë krelanë e me e marrë me vehte për punë, pa pikë problemi.
E mbasi veç jemi tek gjanat e mira, t’shijshme dhe që anojnë kah tradicionalja, mos e le pa e provu edhe leçenikun me purri, krelanën e kallamojtë apo muffins-at e kallamojt’ e pa i lexu edhe 16 thanje interesante shqiptare për ushimin. Shijo! /katror.info/
Ky artikull është përgatit’ nga Kaltrina Zhushi. Për me pa receta të mira dhe te shëndetshme, mundeni me e vizitu blogun e saj në Instagram @gurmaneria
Përgatiti:
