Jeta asht ka bahet çdo ditë e ma dinamike, edhe nime njeri nuk po ka kohë gjithë me ja ba vehtës e familjes hyzmetin n’tryezë nj’ashtu siç ka qejf. Koha e limitume dhe lodhja prej obligimeve t’tjera ditore shpesh na çojnë me ni pikë ku edhe pritojmë me gatu apo përgatitë, meqë na del shumë punë – punë t’cilës mundohemi me ju shmangë.
Secili merakli i ushqimit e kuzhinës i din e praktikon ato truqet e vehta kur vjen fjala tek kuzhina. DIkush shfrytëzon mjete ma t’sofistikume për me arritë rezultate ma t’shpejta e ma t’mira n’realizimin e nji recete, dikush përdorë përbërës “sekret” për me i dalë gjella sa ma mirë, e disa t’tjerë thjeshtë mësojnë prej gabimeve t’maparshme e mundohen mos me i përsëritë ato. Ne jemi n’këtë kategorinë e tretë, dhe si rezultat i mendve t’mbledhuna prej përvojës, t’i kemi radhitë 5 këshilla praktike që secili duhet me i ndjekë n’kuzhinë.
1. Vendose lugën e drurit mbi tenxhere
Krejt jemi përballë me situata ku kemi lanë diçka me zi, jemi largu për pak çaste prej kuzhinës edhe krejt çka kemi zi asht derdhë e ka shkumu. Mirëpo, kësaj katastrofe mundesh me i dhanë fund duke e ndërmarrë nji hap fort t’thjeshtë – vendose nji lugë druri sipër tenxheres. Kjo e parandalon vlimin e shkumimin e ujit, gjellës a çkadoje, pa pasë nevojë me i ndejtë tenxheres te krytë.
2. Ngriji sosat e salcat n’kubëza akulli
Secilit prej nesh na ka ba vakia me përgatitë e me shfrytëzu ndonji sos a salcë, e me na tepru n’tegëll a n’shishe do. E t’gjithë e kemi lanë pjesën e mbetun n’frigorifer me shpresën që e shfrytëzojmë e nuk e lajmë me na shku posht sosi, por e kemi gjetë t’mykun për brenda salcën, meqë prej ajrit asht kriju myk. Epo, edhe për këtë gja ka nji alternativë ma efektive e kursimtare; merr kallëp akujsh, vendose sosin e çfarëdoshëm aty e ngrije n’friz. Kësi soji, sa herë t’nevojitet pak salë, ke racione t’vogla që mundesh me i shfrytëzu, pa e pasë vesin se a asht prishë a jo ushqimi.
Mundesh me e lexu edhe…
3. Para se me i zi vezët, çpoji me gjilpanë
A t’ka ndodhë me i zi vezët, por gjatë zierjes me t’kërsitë e me u derdhë veza jasht? – Nuk je i/e vetmi/ja që asht ballafaqu me këtë gja, për t’cilën ekziston nji zgjidhje e thjeshtë. Merr nji gjilpanë apo këmcore zyreje e krijoje nji vrimë t’vogël n’çdo vezë që don me e zi. Kësisoji vezës i largohet ajri brenda që ka mbetë dhe zihet pa u ça. Poashtu, n’daç që vezët e ziera gjithë me t’dal perfekt, mësoji cilat janë 3 gjanat që DUHESH me i ditë kur zien vezë.
- Advertisement -
4. Xhenxhefilin qëroje me lugë
Nëse e përdorë xhenxhefilin dhe t’ka rastisë me e qëru, atëherë e din sa e vështirë asht me u ba nji gja e tillë me thikë, pa gju posht shumë prej xhenxhefilit. Andaj, për me e shfrytëzu maksimalisht sasinë që e ke n’dispozicion, mjafton me e gërry xhenxhefilin me lugë (e që lehtësisht mundesh me e ba), dhe me përgatitë çkado që e ke nda mendjen me gatu.
5. Griji qepët, vendosi n’qese plastike e ngriji n’friz
Gjersa për sallata preferohet me konsumu qepën e freskët, për gjellëra praktika e t’ngririt t’qepëve, por edhe perimeve t’tjera e lehtëson shumë punën n’kuzhinë gjatë ditëve kur nuk kemi shumë kohë me përgatitë drekë a darkë. Andaj, asht bajagi lehtësim me i pasë qepër e grira e me fillu menjiherë me zierje apo kavërdisje. Mjafton me i pre imët (n’kubëza), me i vendosë n’qese frizi e me i futë n’friz, si dhe me i nxjerrë kurdo që don me përgatitë.
- Advertisement -
Ndjeki këto këshilla dhe mundohu me i ba pjesë t’praktikave t’tua n’mënyrë që me e pasë ma t’lehtë punën n’kuzhinë. E mos e le pa i kuptu se cilat janë 5 gabimet ma t’shpeshta që bahen n’kuzhinë dhe qysh mundesh me i shmangë ato. Kësisoji, çkado që ke me përgatitë, me shumë gjasë ma t’madhe ka me t’dal ma e mirë, pa pasë ti nevojë me e stër-mundu vehtën. Andaj, mos ua ndajë këtyre sygjerimeve! /katror.info/
Ky artikull është përgatit’ nga Kaltrina Zhushi. Për me pa receta të mira dhe te shëndetshme, mundeni me e vizitu blogun e saj në Instagram @gurmaneria
