Nëse je kah planifikon me e përgatitë nji drekë a darkë fenomenale për familjen tande, apo ke ftu mysafirë e po ke qejf prej A-së deri n’ZH me i pritë mirë, ne e kemi nji propozim t’plotë për ty.
Kombinimi t’cilin po ta rekomandojmë për pjatën kryesore asht: kungulleshë e mbushun me pulë dhe e shoqnume me patate t’mbushuna me djathë. E ky kombinim mundet me u ba lehtë, t’u i ndjekë disa hapa t’thjeshtë.
PËRBËRËSIT:
4 kungullesha (t’prera n’mes)
4 lugë gjelle vaj ullini
500 gr gjoks pule (i prerë n’kube t’vogla)
1 lugë çaji oregano
½ lugë çaji hudhër pluhun
½ lugë çaji kripë
½ lugë çaji biber i zi
¾ gotë sos domatesh
¼ gotë djathë parmezan (i grirë)
¼ filxhan djathë mocarella (i grirë)
HAPI 1:
Preji kungulleshat n’mes për s’gjati. Me lugë gërryje pjesën e brendshme me lugë deri sa t’krijohet nji gropë e bollshme për me e nxanë mbushjen me mish pastaj.
HAPI 2:
Mishin e pulës t’prerë paraprakisht n’kube t’vogla kavërdisa me 3 lugë gjelle vaj ullini për 10 minuta bashk me erëzat. Pas 10 minutave shto sosin e domateve dhe kavërdise masën për 10 minuta t’tjera. Kohë pas kohe përzije sasinë.
HAPI 3:
N’ndërkohë që po e përgatitë mishin, vendos kungulleshat n’tepsi me letër për pjekje. Me pjesën e mbetun t’vajit t’ullinit, me brushë lyji kungulleshat për brenda dhe pjeki për 15 minuta n’furrë n’180 C. Kur mishi t’jetë gati, largo tepsinë e fillo mbushi gropat me mish e sos domatesh.
HAPI 4:
Sipër kungulleshave t’mbushuna shto mocarellën e pastaj parmezanin. Vendose tepsinë n’furrë e pjeki kungulleshat për 10 minuta n’150 C. Largo prej tepsisë e servoji n’pjatë. Shoqnoji kungulleshat me patatet e mbushuna me djathë t’cilat lehtësisht i përgatitë.
REZULTATI:
Para se me i servu kungulleshat si pjatë kryesore, ne ta rekomandojmë me e nisë drekën apo darkën me supën sezonale t’kungullit – nji ndër 4 supat që DUHESH me i provu. Pastaj me vazhdu me pjatën kryesore e me e përfundu vaktin me “Pumpkin Bread” (kekun me kungull). Kësisoji, kungulli që ka tepru pa u shfrytëzu gjatë përgatitjes t’supës, nuk çohet dam.
Ne idetë e recetat i ndamë me ty, tash t’mbetet veç me i përvjelë mangët e me i përgatitë këto pjata plot shije e që nime nuk t’marrin shumë kohë. Shijo! /katror.info/
Përgatiti:
