Ramazani për shumëkand asht periudhë e vitit e cila i mundëson atyre që e presin dhe përcjellin atë me reflektu n’shumë gjana shpirtnore, por edhe n’shprehitë dhe rutinat e tyre. Megjithatë, shumë njerëz e nisin agjërimin për arsye personale, shpirtnore, religjioze, por nuk janë t’mirënjoftuar se qysh me u ushqy përgjatë këtij procesi – gja që luan rol bajagi t’madh e që nuk duhet neglizhu.
Ramazani për shumëkand sjellë ndryshime n’t’ushqyer dhe n’shprehitë e konsumit pikërisht për faktin se zvogëlon orët e konsumit, por edhe synon me kriju nji rezistencë e vetpërmbajtje ndaj lakmisë dhe tundimeve momentale. Megjithatë, jo domosdoshmërisht çdo formë e privimit prej ushqimit dhe konsumimit n’kohë t’caktume asht mënyrë e shëndetshme dhe efektive për me i ba mirë shnetës dhe mirëqenies tonë, andaj edhe ka disa aspekte t’cilat kushdo që agjëron duhet marrë parasysh, e ne t’i kemi renditë 8 ma kryesoret.
1. Sigurohu me qenë i/e hidratum’/e
Nëse je duke agjëru, asht mirë me u siguru me qenë sa ma i/e hidratum/e e me u kujdesë që mos me’i hupë langjet n’trup. Kështu, asht mirë që me t’ardhë iftari me pi fillimisht ujë e pse jo deri n’syfyr me provu me konsumu sa ma shumë langje; jo langje artificiale frutash e t’gazume, por e kemi fjalën për ujë, çaj dhe kafe me sa ma pak sheqer. N’fakt, edhe jashta ramazanit, uji asht burimi ma i mirë hidratues. Për ekstra shije dhe detoks, mundesh me konsumu edhe ujë me limon ose ujë me fruta – ndryshe i njohun edhe si ujë detoksifikues e që rritë energjinë n’trup nëse konsumohet rregullisht.
2. Nise iftarin me 2 deri n’3 hurma
Edhepse shumica e nisin Iftarin me hurma, sepse kështu e don tradita, jo t’gjithë i dijnë benefitet e hurmave dhe vlerat ushqyese që konsumimi i tyre sjellë. Kështu, 2-3 hurma janë ma se t’mjaftueshme për me t’furnizu me sheqer natyral dhe me t’mbushë energji falë fibrave që përmbajnë. Biles, nëse ke kokëdhimbje, hurmat munden me t’ndihmu me ta ndalu dhimbjen, por edhe me ta stabilizu sheqerin nëse e ke t’ulët – gja që ju ndodhë shpesh atyre që e mbajnë ramazanin.
Mundesh me e lexu edhe…
3. Shtoja iftarit tand 1 pjatë me supë
Supat janë gjithmonë nji zgjedhje efektive me e përfundu agjërimin, meqë t’mbajnë t’hidratum/e dhe janë t’pasuna me vitamina e minerale. E mbas nji dite pa hangër e pa pi, definitivisht këto vlera ushqyese e langje janë t’mirëseardhuna për organizmin. Megjithatë, jo çdo supë asht e rekomandueshme për konsum. Kështu, supat kremoze që përmbajnë qumësht, krem-qumësht dhe përbërës shtazor munden me ta ngarku lukthin dhe asht mirë me ju shmangë. Mundohu me konsumu supa t’pasuna me perime dhe thjerrëza. Ne po ta rekomandojmë supën me thjerrëza dhe limon, ose supën marokiene me thjerrëza dhe perime.
4. Ha sa ma shumë perime (Zarzavate)
Nuk do mend që perimet janë t’nevojshme dhe t’dobishme për shëndetin tonë, aq ma tepër nëse agjërojmë dhe jemi n’deficit t’kalorive, por edhe vlerave ushqyese. Kështu, t’ngarnunit iftar e syfyr me sa ma shumë perime para vehtës asht nji alternativë e mirë me kriju rezistencë e imunitet ma t’fortë përgjatë ramazanit. Andaj, mundohu që n’2 vaktet (syfyr dhe iftar) me përfshi t’paktën nga 1 grusht/gotë perime t’freskëta ose t’ziera. Kështu, perimet e pjekuna n’furrë, ose sallatat e ndryshme sikurse: sallata persiane “Shirazi”, apo sallata “Cowboy Caviar” – janë disa nga sallatat e thjeshta e plot shije t’cilat mundesh me i përgatitë e hangër.
5. Provo me hangër karbohidrate t’shnetshme
Megjithëse je agjëruesh dhe mundesh me lakmu edhe n’gatesa t’ndryshme sikurse janë pitet, flijat, krelanat e mantijat, asht mirë që vaktin e iftarit me e përtheku me ushqime t’cilat përmbajnë karbohidrate t’shnetshme e që nuk ta randojnë lukthin. Disa ushqime t;rekomandushme e që përmbajnë karbohidrate t’shnetshme janë orizi integral, patatet, bullguri, qiqrat e kuskusi. E nëse je n’dilemë se çka kishe hangër, ne t’rekomandojmë me provu 1 prej 3 sallatave t’kuskusit, sallatën mediterane t’patateve, sallatën e patateve me pesto, ose sallatën krokante me qiqra – krejt këto sallata sa t’mira e plot shije, poaq t’lehta me u përgatitë, veçanarisht për ramazan.
6. Syno me marrë proteina me sa ma pak yndyrë
Gjatë iftarit, konsumimi i proteinave t’shnetshme pa yndyrë asht shumë i rëndësishëm. Proteinat e shëndetshme dhe të plota si mishi i viçit, qumështi, kosi, vezët, djathi e peshku përmbajnë aminoadice t’cilat ta rujnë, por edhe prodhojnë masë muskulore – masë t’cilën me keq-ushqyerje mundesh me rreziku me e humbë. Ama kur flasim për mish e produke t’qumështit, kije parasyshë që po flasim për mish pa dhjamë (me sa ma pak yndryrë) si dhe prodhime qumështi me sa ma pak përqindje t’yndyrës. Receta si pula me marinadë greke, apo qoftet me mish pule janë disa opsione t’përshtatshme. Ndërkaq nëse je vegan/e ose vegjetarian/e, ose thjeshtë preferon me konsumu ma tepër produkte jo-shtazore, atëherë ta rekomandojmë me shti n’menynë tande t’iftarit receta që përmbajnë fasule e bishtaja (bizele), dhe fruta arrore. Kësisoji, gatesat sikurse fërgesa me pasul dhe spinaq, ose kërpudhat e mbushuna me qiqra dhe arra janë disa opsione t’përshtatshme, veçanarisht për iftar.
7. Mos u ngut me hangër iftarin
Veç pse nuk ke hangë tanë ditën, nuk asht nevoja me u ulë e me e shkatërru lukthin brenda pak minutave. Mos u nxito me hangër, anipse mundesh me qenë i/e untë. Provo e jepi pak kohë vehtës me u adaptu me faktin që je duke i dhanë trupit ushqim, duke hangër ngadalë, duke ba pauza t’shkurta n’mes pjatave, por edhe duke u përtypë mirë e duke hangër sasi t’moderume prej secilit ushqim. Mos harro që edhe lukthi ka nevojë me e përjetu njifarë tranzicioni + e ke krejt kohën e mundshme me u ulë e me hangër prap edhe mbasi t’jetë shtre iftari. N’këso raste, vërtetë vlenë thanja “Ha shpesh e ngapak”, fundja, kërkush nuk po t’ngutë, plus kjo praktikë ndihmon që mos me shtu peshë përgjatë ramazanit.
8. Shmangju ambëlsinave që përmbajnë shumë sheqer
Ushqimet e randa që përmbajnë shumë sheqer duhet me u shmangë edhe n’përditshmëri, por edhe ma tepër asht mirë me ju ikë nëse je agjërueshëm. E dijmë që mundet me qenë frustruese mos me hangër ambël mbas nji dite t’ngarkume plus pa bukë, por mos harro që lukthi mundet me u shoku nëse përnjiherë merr sasi t’naltë t’sheqernave. Kështu, n’vend t’ndonji ambëlsinës me shërbet, shumë shllag, çokollatë a sheqer, ma mirë asht me përgatitë alternativa t’shnetshme t’ambëlsinave sikurse janë: bombicat proteinike dhe bombicat prej kungulli, pllakat e jogurtit me fruta mali, parfait-et me fruta mali, ose bananet me gjalpë kikiriku. Ndërkaq, hala ma mirë asht nëse thjeshtë konsumon fruta t’fresëta; mollat, dardhat, portokajt, kivit përshembull.
Nëse je duke agjëru, apo po e konsideron me fillu agjërimin dhe i shqyrton me seriozitet këto 8 aspekte nutriciste, jemi t’bindun që ke me e kalu lehtë, pa u lodhë dhe pa u untu secilën ditë t’cilën e agjëron. Mjafton që me i marrë për bazë rekomandimet/udhëzimet tona për krijimin e shujtava, mos me u ngutë me hangër dhe me i dhanë kohë e mundësi vehtës dhe organizmit që me i marrë t’gjitha vlerat ushqyese n’sasinë e duhun pa pas’ nevojë me hjek dorë prej shijes. Mos harro, sikurse dietat e ndryshme, edhe agjërimi kërkon vet-përmbajtje dhe pak strukturim sa i përket përgatitjes t’shujtave dhe konsumimit t’tyre. /katror.info/
Ky artikull është përgatit’ nga Kaltrina Zhushi. Për me pa receta të mira dhe te shëndetshme, mundeni me e vizitu blogun e saj në Instagram @gurmaneria
Përgatiti:
