Kuzhina meksikane asht nji ndër kuzhinat ma t’famshme e ma t’preferume t’njerëzve t’kulturave t’ndryshme n’mbarë botën. Ajo njihet për delikatesat n’petë, me shumë djegësti, përbërës t’freskët e kombinime interesante, por edhe për variacionet e ndryshme t’cilat i ofron. E jo kot, tacos, tortillas, enchiladas, tamales e specialitete t’ngjashme kanë zanë vend n’menytë e mijëra restoranteve anë e mbanë.
Sot kemi vendosë me t’njoftu me nji version ma t’shnetshëm t’enchiladas, version ky që nuk ja len keq me shije, por që nuk përmbanë kalori. Ideale për njerëzit që mbajnë dietë, ruhen prej brumnave apo thjeshtë preferojnë me u ushqy ma shnetshëm. E patjetër që nji pjatë me enchiladas prej kungulleshe, asht nji pjatë me plot shije.
PËRBËRËSIT:
400 gr mish pule t’zier (i imtësum n’fije)
2 lugë gjelle vaj ullini
1 qepë (e grirë)
2 thelpinj hudhra (t’grira)
1 lugë t’mesme biber i kuq
3 kungullesha (t’preme n’rriska t’holla)
1 lugë e mesme vegetë
1 lugë çaji këri (Curry powder)
1 e 1/2 gotë salcë pikante domatesh
150 gr kashkavall (i grirë)
Limon ose limetë (opsionale)
Mundesh me e lexu edhe…
HAPI 1:
Shto n’tigan vajin e ullirit dhe kavërdise qepën me erëza bashk për 7 minuta. Shto pulën e copëtume bashk me salcën dhe kavërdie masën pë 5 minuta.
HAPI 2:
Me qëruse për patate preji kungulleshat n’rriska. Bashko 3 rriska sipër njana tjetrës, shto mishin me salcë pikante dhe mbështjelli n’formë rollate rriskat e kungulleshës. Kësi soji vazhdo me pjesën e mbetun t’harxhit.
HAPI 3:
Lyje tepsinë me brushë me pak vaj ullini. Renditi rollatat n’tepsi mirë. Shto sipër tyre pak salcë pikante.
HAPI 4:
Shto sipër rollatave kashkavall dhe vendose tepsinë n’furrë për 20 minuta. Largo prej furrës dhe servo sipër me magdanoz t’freskët po deshe, rriska avokadoje dhe pak lang limeteje.
REZULTATI:
Shijoji enchiladas prej kungulleshe me pak salcë meksikane, avokado e salcë kosi po deshe, E çka t’tepron mundesh me e marrë t’nesërmen n’punë pa problem e me shiju sikur me pas përgatitë sot – mjafton me e nxe pak n’mikrovalë pjatën.
Meqë jemi tek recetat me kungulleshë, mos e le pa i provu edhe kungulleshat e mbushuna me pule (recetë jo-meksikane). Poashtu, nëse ke merak n’gatimet meksikane, mos e le pa i provu fajitas me pulë dhe perime apo fajitas me mish viçi dhe perime. Jemi t’bindun që kanë me t’pëlqy po aq sa edhe enchiladas prej kungulleshe. Shijo! /katror.info/
Ky artikull është përgatit’ nga Kaltrina Zhushi. Për me pa receta të mira dhe te shëndetshme, mundeni me e vizitu blogun e saj në Instagram @gurmaneria
Përgatiti:
