Idetë e ndryshme për ushqim, servim dhe dekorim t’pjatave festive janë element i randësishëm i cilësdo festë. Kujdesi për detaje, servim e dekorim asht hap i randësishëm dhe që e ban diferencën n’raste ma speciale. Pjatat festive nime i japin hijeshi edhe ma shumë secilës tryezë, veçanarisht kur kemi motive t’mëdhaja për me nda gëzimin me ma t’dashtunit tanë. E që nuk don diskutim sa e randësishme asht nji meny e begatume dhe e kurume mirë e dëshmojnë ma s’miri eventet sikurse janë netët e beqarisë, ose ndryshe t’njohuna si “Bachelorette Parties”, ose “Bridal Shower”.
N’qoftë se je ka e organizon nji “Bridal Shower” qoftë për vehte, apo dikand që e ke afër zemrës dhe je n’kërkim t’recetave e t’pjatave interesante, elegante dhe unike n’shije, atëherë qe ku t’i kemi mbledhë idetë ma t’mira t’mundshme n’nji artikull t’vetëm dhe ta kemi shpjegu se qysh mundesh secilën prej tyre me e realizu – e suksesin po i ndoqe udhëzimet tona e ke t’garantum.
Duhet me ditë që kur gostitë ma shumë mysafir ( ma shumë se 10 persona), nji tryezë ku secili mundet me u vet-shërby (byfe e hapun) kish me qenë nji zgjidhje ideale dhe praktike – sepse jo çdokush ka qejf me hangër çka i caktohet. Andaj edhe ne i kemi zgjedhë disa “Finger Food”, ambëlina dhe disa sygjerime pijesh ku secili mysafir mundet me e gjetë vehtën.
1. Kafshata bosani me djathë feta
Nji mënyrë e mirë dhe e lehtë me i dhanë shije dhe super-pamje tryezës tande t’beqarisë asht duke përfshi fruta, perime dhe përbërës t’freskët dhe që nuk marrin shumë kohë me u përgatitë. E tillë asht receta e kafshatave t’bostanit me djathë feta, për t’cilën mjafton me e pre bostanin dhe djathin n’kubëza mesatarisht t’vogla, me i bashku me rrëmojsa ose shkoptha dekorativ dhe me ua bashkangjitë nga nji gjethe mente sipër.
Mundesh me e lexu edhe…
2. Tuna pasta-sallatë
Tuna pasta-sallata asht prej atyre recetave që mundesh lehtësisht me e përgatitë nji ditë ma herët, me e vendosë n’frigorifer e me e servu n’pjatë t’nesërmen pa problem. Kështu, nëse e ke ba n’plan me përgatitë nji laryshi ushqimesh dhe po don me i kursy pak kohë vehtes paraprakisht, atëherë kjo recetë asht shpëtimtarja jote.
3. Krostini salmoni me krem-djathë
Nëse je ka don me i shty pak ekstravagancë dhe ekskluzivitet tryezës, atëherë krostinit me salmon t’tymosun dhe krem-djathë asht zgjedhja ma e mirë që mundesh me ba. Mjafton me i rreshkë disa rriska buke n’furrë, me ua shtu rriskat e salmonit sipër, krem’djathin e mpërzi me erëza sipas dëshirës dhe kopër t’freskët dhe me e vendosë sipër salmonit me shfrydhëse shllagu ose lugë.
4. Krostini me proshutë dhe dardhë
Edhe krostinit me proshutë dhe dardhë, njilloj sikurse edhe krostinit me salmon dhe krem-djathë nuk t’marrin shumë kohë me i përgatitë, por definitivisht garantojnë shije unike. Mjafton me i rreshkë rriskat e bukës e me i ly sipër me salcë fete, me i laku proshutat e prera hollë sipër e me ua vendosë nga nji rriskë dardhe me pak mente t’grirë përmbi.
5. Bukë me hudhër
Ndër ushqimet ma t’njohuna si “finger food” edhe “party food” padiskutimisht asht buka me hudhër e njohun ndryshe edhe si “garlic bread” t’cilën padiskutimisht kurdo e kudo që e servon nuk mundesh me gabu, e aq ma pak n’nji nejë beqarie – ku shumica kanë me dashtë me e hangër t’paktën nji copë t’tillë. Krejt çka t’duhet asht do bukë, pak gjalpë, hudhër e erëza dhe kashkavall.
6. Meze djathërash
Asnji ndejë a festë nuk ka kuptim pa ja bashkangjitë tryezës nji meze t’mirë, e as “Bachelorette-i” nuk asht përjashtim. Përgatite nji meze djathërash dhe frutash arrore për me e kompletu tryezën festive n’mënyrën ma t’mirë t’mundshme. Mundohu me shtu nji laryshi djathërash t’fortë e t’butë sikurse janë: djathi i katunit, djathi feta, mocarella, pekorino, kashkavallët e ndryshëm, djathi franqez “Brie”, djathërat me spec, fruta apo arra brenda etj. Kësisoji ka mundësi zgjedhje për kando. Shto fruta arrore sikurse arrat, bademat, lajthiat e arrat indiane për zbukurim e shije bashk me keksa t’njelbët, mjaltë e shkoptha krokant. Mos harro me ju dhanë forma t’ndryshme djathërave dhe me i rregullu mirë n’pjatë.
7. Kokoshka / kokica (Popcorn)
Kokoshkat / kokicat jana prej atyne ushqimeve që lehtësisht mundesh me i përgatitë për çfarëdo rasti, e pse jo edhe për bachelorette. E bardha e kokicave kombinohet lehtësisht me gatesat dhe ambëlsinat e tjera. E ma e mira e tyne asht që edhe mundesh me i përgatitë lehtësisht vet, por edhe mundesh me i ble t’gatshme n’dyqan po nuk pate kohë, qejf a mundësi me i përgatitë vet.
8. Kroasan me krem-vanillë dhe dredhëza
Asht mirë me u kujtu që disa njerëz parapëlqejnë me hangër ambël n’vend t’njelbëtës, andaj edhe gatimet e ambla nuk kanë pse me mungu n’nji nejë speciale sikurse kjo që ti po e planifikon qoftë për vehte, motrën, shoqen e zemrës apo kolegen ma t’qart që e ke (varësisht për kand po e planifikon ndejën e beqarirë). Kështu, kroasanat me krem-vanillë dhe dredhëza janë nji rekomandim i joni t’cilin mundesh me e shtu n’tryezë. Këto kroazanë mundesh lehtësisht me i mbushë me fill vanille dhe me i dekoru me dredhëza e sheqer pluhun vet – mjafton me i porositë n’furrë kroasanët, apo edhe me i porositë dikund – meqë shumë vende i përgatisin ato.
9. Mini-tartinë me krem limoni dhe dredhëza
Nëse përgatitja ose porositja e kroasanëve t’duket e lodhshme ose vështirë e realizueshme, atëherë nji alternativë e mirë dhe praktike asht përgatitja ose porositja e mini-tartinave me krem-limoni dhe dredhëza – ambëlsinë kjo që n’shumicën e ambëltoreve tashma gjindet lehtë. T’vogla, jo fort t’ngarkume me dekorim dhe simpatike e elegante me u pa – këto ambëlsina nime i shkojnë nji tryeze çikash.
10. Keksa limoni
N’nji bachelorete nuk ka qysh mungojnë ushqimet që anojnë e kombinohen me t’bardhën. Kështu, ambëlsinat e ndryshme t’bardha, me fill limoni, vanille, kokosi – janë t’mirëprituna dhe ideale për nji event t’tillë. Përpos që shkojnë shumë me moton e ndejës, keksat me limon janë nji mënyrë perfekte me e mbushë tryezën me ushqim t’shijshëm, por edhe t’pashëm për sy.
11. Shampanjë / Prosecco nusërie / beqarie
Padyshim që nji festë nuk asht festë pa pasë edhe pije t’ndryshme. Kështu, për kando që e din që ka merak me festu t’u pi, ideja e gotave t’prosecco-s me pambuk sheqer asht diçka që mirëpritet prej shumëkujt. Mjafton me zgjedhë nji Shampanjë ose Prosecco dhe me marr n’dyqan pambuk sheqer t’bardhë ose t’pembe (zakonisht gjinden t’paketume n’gota plastike). Vendos shampanjën ose prosecco-n n’gotat e dëshirume, shpërndaje sipër rrethit t’gotës pambuk sheqerin – kaq.
12. Cosmopolitan
Nji bachelorette party nuk asht i kompletum nëse nuk përmbanë nji variacion pijesh t’ndryshme. E kur flasim për pije, po i mendojmë ngapak edhe koktejet – pije këto që s’ban pa i përgatitë (t’pakën disa). Zgjedh gota ekstravagante e mbushi disa prej tyre me koktellin e famshëm “Cosmopolitan” i cili i shkon shumë nji ndeje çikash dhe nuk dështon me t’i qejfleisë shoqet. Nj’ashtu edhe “Strawberry Margarita-n” mundesh me e përgatitë lehtësisht e me ua servu mysafireve po deshe.
13. Limonatë nusërie / beqarie me grejpfrut
Jo çdokush pin alkool dhe asht ma se e kuptueshme që duhet me ju ba zgjidhje krejt mysafirëve, veçanarisht nëse ke mbledhë numër ma t’madh njerëzish. Mirëpo, kjo nuk do t’thotë që me hjekë dorë prej elegancës dhe shijeve interesante t’cilat mundesh me i ofru. Kështu, limonata me shije grejpfruti asht nji mënyrë praktike, por edhe shumë origjinale me ofru pije interesante n’ahengun tand, pa u mundu shumë. Mjafton me i shtrydhë disa grejpfruta e me i trazu me ujë, sheqer dhe lang limoni e pak ananasi, me i servu n’gota interesante e me i dekoru me nga nji rriskë grejpfruti.
14. Cupcakes nusërie / beqarie
Nëse ke qejf mos me e maltretu as vehtën e as tjerët për pjata e enë, ataherë mënyra ma mirë e ma praktike për servim t’ambëlsinave asht me porositë ose gatu Cupcakes – meqë hahen ma lehtë, por edhe e kompletojnë pamjen e secilës tryezë. Ne t’rekomandojmë me shku me shije klasike vanille ose limoni dhe mos me i ngarku shumë me detaje këto ambëlsina. N’vend t’dekorimit t’kekut me marcipan (i cili zakonisht nuk hahet dhe gjuhet posht) ne t’rekomandojmë me vendosë shkoptha dekorativ me detaje “Bachelorett-i” sikurse n’shembullin lartë. Kësisoji edhe ambëlsinat duken bukur, edhe hahen tanësisht.
Pavarësisht se çka vendosë me provu e gatu, ne urojmë që n’fund ti e t’tjerët me u nda t’kënaqun. Mos harro që me randësi asht n’fund t’fundit ti me kalu mirë bashk me mysafirët dhe me investu n’mirëpritje, muhabet e atmosferë t’mirë.
Kujdes mos përgatit edhe tepër shumë ushqim e me t’shku dam – andaj, mos ha me sy, por mendo mirë për racionet që i servon. Ti njilloj mundesh me kqyrë edhe çka me përgatit’ nëse nji “pink baby shower” po e gostitë, ose edhe nji “Blue baby shower” e pse jo me u inspiru edhe prej rekomandimeve që i kemi vendosë për këto evente. Gëzuar! /katror.info/
Ky artikull është përgatit’ nga Kaltrina Zhushi. Për me pa receta të mira dhe te shëndetshme, mundeni me e vizitu blogun e saj në Instagram @gurmaneria
Përgatiti:
